我的 Hip Hop

仲記得第一次聽到你嘅聲音
嗰種感覺點樣騷動我
心深處嘅靈魂
一直植根嗰種熱情仲未降溫
甚至密不可分我因為你
揾到我嘅存在感
由果日起我地一齊打波
一齊跳舞踩板返學
我地拎住IPod
著對AIR FORCE去打破隔膜
過每個日出日落
我聽住你嘅音樂
你冇揼低我一個
自此我地相處每一日
每次我地講嘅what's up
嗰個手勢有幾獨特
uh 我都仲記得
即使旁人唔明白
話我地姿態太奇特
但係我對你太投入
將佢地視之為無物
Yup So What 只要我戴起個耳塞
有你係身邊
我頓時變得怡然自得
同你每一日
都好似變得更充實
而呢一則故事
就係我十六七歲埋下伏筆
自始我開始寫低我地嘅事
用我每隻字
去到堆砌屬於我地嘅詩
冇人會知道冇遇上
你嘅話我地又會發生乜野事
因為個故事從來
冇NG從來冇PLAN B
Yo起碼到現時為止
已經冇野可以取代到
你係我心中嘅位置
甚至太多人話鍾意
你所以我至在意
點解佢地一講起你
嘅時候硬系串錯字
Uh或者係佢眼中
我地系個金礦
我會相當失望
當你甘心被綑綁
所以我試過放低
你當考驗下對方
先至發覺我已經系
你不可或缺嘅配方
我唔知道冥冥中系已經整定
定抑或系我生命中
有野要秉承
但系如果我地嘅相遇
系個使命
咁我地就係呢個路口
黎做個見證俾HIP HOP
或者我地嘅相遇
都只係一個過程
甚至系任何一個階段入面
都可以視為一個課程
但係最重要係
係呢個旅程入面
可以互相去肯定
或者由我第一次
揸起支Mic嘅時候
已經決定緊
我之後所做嘅一切
但係我發覺做乜都冇所謂
因為最重要係於心無愧
同好多野都係事在人為
所以我保持住
呢份信心同埋童真
令我更加確立我之後嘅人生
就係可以去創造
一份又一份與世無爭嘅藝術品
而我知道你並唔係一個鎖
你嘅出現並唔係
為左去鎖住我同阻住我
而係你反而令我睇得更加清楚
我只不過係其中一個你
你只係其中一個我
呢個就係我嘅Hip Hop